“Gardentasuna eta Gobernu Ona hobetzeko Adimen Artifiziala” izeneko hitzaldian, Camposek azpimarratu du “erabaki automatizatuak hartzen direnean edo IAk esku hartzen duenean, herritarrek jakiteko eskubidea dutela”, eta azaldu du zein garrantzitsua den eskubide hori defendatzeko eta bermatzeko buru den agintaritza independenteak egiten duen lana, edozein dela ere informazioaren xedea, algoritmoak, iturburu-kodea eta abar.

Haren ustez, IA erronka handia da administrazio publikoentzat, baina, horrez gain, aukera ezin hobea da gardentasun publikoa sustatzeko, batez ere publizitate aktiboaren eremuan, gardentasun-atarietan.

Madrilen egin den foro horretan, hainbat aditu elkartu dira, justizia, segurtasuna, hiri-kudeaketa edo datuen gobernantza herritarren zerbitzura dagoen digitalizazio adimenduna nola lantzen ari diren eztabaidatzeko. DigitalES erakundeak antolatu du jardunaldia, eta telekomunikazioetako, teknologiako eta berrikuntza digitaleko enpresa liderrak biltzen ditu.