RESUMO

Un cidadán presentou unha solicitude de acceso á información dirixida á empresa pública Enxeñaría e Economía do Transporte, S.A. (INECO), adscrita ao Ministerio de Fomento, destinada a coñecer as retribucións percibidas polos membros do equipo directivo da compañía (identificados como tal na súa propia páxina web) durante o ano 2014. INECO denegou a solicitude ao entender que só estaba obrigada a fornecer a retribución percibida polo seu Presidente, de acordo ao previsto no artigo 8 da Lei de Transparencia que dispón a publicación das retribucións dos altos cargos e máximos responsables das entidades incluídas no ámbito de aplicación da Lei.

Presentada reclamación ante o Consello de Transparencia e Bo Goberno, este entendeu que a mesma debía estimarse e, por tanto, que a información debía ser fornecida. Como base dos seus argumentos, o CTBG considerou que, de acordo con o previsto na norma, as obrigas de publicidade activa previstas na mesma son un mínimo de información que os organismos suxeitos á Lei debían facer pública de forma proactiva e sen necesidade de pedimento expresa. Doutra banda, e en exercicio do dereito de acceso á información, recoñecido e regulado na mesma norma, era posible solicitar outra información en poder do organismo. O acceso a esta información debe ter en conta, en todo caso, a posible aplicación das causas de inadmisión e os límites ao dereito de acceso previstos na norma.

Neste caso concreto, o CTBG considerou que o acceso ás retribucións percibidas polo equipo directivo de INECO, entraban no concepto de información pública previsto na Lei, que o seu coñecemento tamén cumpría os criterios fixados por este organismo no criterio interpretativo nº 1, aprobado conxuntamente coa Axencia Española de Protección de Datos (AEPD) ao ter en conta a posición relevante do equipo directivo dentro da organización e o seu papel no proceso de toma de decisións e que, por tanto, non concorría ningunha outra circunstancia- que, doutra banda, tampouco fora alegada- para denegar a información.

Non conforme coa resolución, INECO presentou recurso contencioso-administrativo fronte á mesma.

Estado: A sentenza do xulgado central contencioso-administrativo nº 10 de Madrid é unha sentenza firme a favor de facilitar a información.