RESUMO

Un cidadán solicitou ao Ministerio de Educación, Cultura e Deporte a identidade dos expertos que interviñeran nos procedementos de acreditación para o acceso aos corpos docentes universitarios nos que participara.

Presentada reclamación por non obter resposta, o Ministerio alegou que, de concederse a información, estar a vulnerar o límite previsto na LTAIBG relativo á garantía da confidencialidade ou o segredo requirido no proceso de toma de decisións (art. 14.1 k).

Na súa resolución, o Consello de Transparencia e Bo Goberno considera que o acceso á información persoal que se solicita (tendo en conta que se piden os nomes e apelidos dos expertos) suporía unha vulneración do seu dereito á protección de datos non amparada polo dereito de acceso á información pública regulado na LTAIBG. Así mesmo, e tendo en conta “que se ben se trataría do acceso á identidade dos expertos a posteriori, é dicir, unha vez que o procedemento de acreditación xa finalizou, non é menos claro que (…) a denegación ou non da información vincularía a futuros procedementos, xa que cambiaría o marco conforme ao cal se elaboran os informes de expertos”, considera de aplicación o límite alegado ao considerar que: “Tendo en conta todos estes elementos de xuízo (a incidencia limitada do informe no proceso de acreditación, debido a que a decisión recae na Comisión de acreditación; o feito de que este informe, elaborado no anonimato, poida ser emitido con maior liberdade; que a identidade dos expertos, agrupadas por áreas de coñecemento, xa sexa pública e, derivado diso, que poida iniciarse un proceso de recusación con carácter previo á eventual participación nunha concreta solicitude de acreditación permiten concluír que, neste suposto, prevalece a protección do segredo requirido nos procesos de toma de decisión, nos termos previsto no artigo 14.1 k) da LTAIBG”

O solicitante, en desacordo co criterio contido na resolución do Consello de Transparencia, interpuxo recurso contencioso-administrativo.

Estado: Neste momento xa hai sentenza do xulgado central contencioso-administrativo nº1 de Madrid a favor da resolución do Consello de Transparencia e Bo Goberno e sentenza en apelación desestimada, é dicir, que confirma a anterior.