O novo logo desta Autoridade Administrativa Independente (AAI), que mantén a característica cor verde do emblema orixinal, caracterízase por unha maior rotundidade, claridade e sinxeleza, para adaptarse mellor á contorna dixital. Está formado por un símbolo de liñas contundentes, un bloque verde e robusto inspirado na obra do escultor Eduardo Chillida. Ao observar con detemento a través das súas formas cadradas e aliñadas revela a súa transparencia en forma de letra ‘T’.

Xunto ao símbolo figura o nome da institución: ‘Consello de Transparencia AAI’, co que se quixo simplificar no logotipo a denominación completa do organismo por un dobre motivo: en aras desa maior sinxeleza visual e, sobre todo, para reflectir con maior fidelidade as competencias que ten atribuídas.

En palabras do presidente do Consello, José Luis Rodríguez Álvarez, “nun ano tan sinalado para a institución, que en decembro conmemorará os dez anos do nomeamento da súa primeira presidenta, a lembrada Esther Arizmendi, quixemos renovar a nosa imaxe corporativa, de forma que se integre mellor nas contornas dixitais e para que exprese con claridade o noso compromiso coas funcións que temos encomendadas: velar pola transparencia das administracións e protexer o dereito de todas as persoas a acceder á información pública”.