Recorrente: Ministerio de Transportes, Mobilidade e Axenda Urbana (ADIF)

Resolución recorrida: R/0465/2022

En exercicio do seu dereito de acceso á información, un cidadán presentou escrito ante o Administrador de Infraestruturas Ferroviarias (ADIF), adscrito ao Ministerio de Transportes, Mobilidade e Axenda Urbana, solicitando información sobre a delimitación de dúas entidades inmobiliarias, que compoñen a Unidade Especial inventariada A-78/5 Madrid-Delicias, das que ADIF é titular. Solicita que se lle proporcione a información, ben mediante copia de escritura pública, ben por outro medio no que estea rexistrado pola entidade pública.

A Administración ditou resolución denegando o acceso ao considerar que existe un réxime xurídico específico de acceso á información en materia tributaria, establecido legalmente nunha norma sectorial, a Lei 33/2003, do 3 de novembro, do Patrimonio das Administracións Públicas, concretamente no seu artigo 33.4 – referido ao Inventario Xeral de Bens e Dereitos do Estado (INVESPE)-. Ademais, invoca a concorrencia das causas de inadmisión contempladas no artigo 18.1.b) e e) LTAIBG, ao tratarse de información de carácter auxiliar ou de apoio, por unha banda, e ser a solicitude abusiva, non xustificada coa finalidade de transparencia da Lei, por outra.

Presentada reclamación con arranxo ao artigo 24 LTAIBG, o Consello de Transparencia e Bo Goberno estímaa, ao considerar, por unha banda , que ADIF en ningún momento nega que esta información exista e obre no seu poder nun soporte distinto ao conformado polo INVESPE, e que o réxime específico de acceso a este Rexistro non impide que se exerza o dereito de acceso á información pública ao abeiro da LTAIBG cando tal exercicio non sexa incompatible coas disposicións singulares do mesmo. Ademais, o feito de que este Inventario Xeral non teña a consideración de rexistro público comporta, entre outras cousas, que non se poden solicitar certificacións do seu contido e que a información del extraída non goza de fe pública rexistral. Por outra banda, sobre unha propiedade inmobiliaria dunha entidade como ADIF debe pesar o mandato xeral de publicidade que o artigo 8.3 da LTAIBG impón ás administracións públicas.

Finalmente, e en relación coas causas de inadmisión invocadas, considera o Consello que non cabe apreciar a súa concorrencia neste suposto, xa que non pode considerarse a solicitude abusiva nin presentar, a información demandada, as características que poderían facer que sexa cualificada de auxiliar ou de apoio.