Durante a reunión, intercambiaron experiencias e coñecementos sobre o funcionamento das institucións encargadas de garantir a transparencia e o dereito de acceso á información pública en España e Chile, así como sobre os respectivos marcos regulatorios que sustentan a súa actividade.
Neste sentido, no encontro púxose de relevo que no modelo chileno o Consello para a Transparencia dispón de potestade sancionadora fronte aos incumprimentos das súas resolucións e as obrigas de transparencia. Esta capacidade contribúe de forma decisiva a reforzar os niveis de cumprimento e transparencia das entidades públicas.
Así mesmo, a reunión serviu para abordar algúns dos principais retos que afrontan actualmente os organismos garantes da transparencia, como a transparencia algorítmica, e as novas demandas cidadás en materia de acceso á información pública.
A visita adquire unha relevancia especial ante a próxima asunción por parte de María Jaraquemada da presidencia rotatoria do CPLT, responsabilidade que exercerá desde finais do próximo mes de outubro.
Ambas as institucións forman parte da Rede iberoamericana de Transparencia e Acceso á Información (RTA) e coincidiron na importancia de seguir fortalecendo os espazos de cooperación e intercambio de boas prácticas entre organismos garantes, co obxectivo de promover unha maior transparencia, rendición de contas e protección efectiva do dereito de acceso á información pública.